Cavid TƏBRİZLİ
Müğənni / Güney Azərbaycan
Hörmətli forum iştirakçıları! Mən hamınızı ürəkdən salamlayıram. Məni bu ehtişamlı, bu gözəl tədbirə dəvət etdiyiniz üçün də sizə ayrıca təşəkkürlərimi bildirirəm. Mən böyük öndərimiz, Cumhurbaşqanımız, rəhmətlik ELÇİBƏYin haqqında bir dənə xatirəmi anlatmaq üçün gəldim buraya Türkiyədən. Xalqımın mənə verdiyi müğənni sifəti, mənə verdiyi Azərbaycan müğənniliyinin şərəfi bir tərəfə, alqışları ilə həmişə böyümüşəm. Ancaq böyük öndərimiz, liderimizin mənə həmişə verdiyi bir dəyərdə mənim həmişə başımı göylərə qədər dəydirib. Mən istəyirəm ELÇİBƏYin bir xatirəsini burda həmişə ürəyimdə yaşatdığım bir xatirəni sizlərə də çatdırıram. ELÇİBƏY hər Türkiyəyə gəlişində mən həmişə Türkiyədə bərabər oldum ELÇİBƏYlə, ziyarətinə getdim. Burda təəssüflər olsun ki, heç elə bir imkan yaranmadı. Həmişə məndən Təbriz mahnısını istədi.
Qollarım dolana boynuna bir gün,
Yenə baş qoyaram dizinə Təbriz.
Həsrətdən, hicrandan cana doymuşam,
Doyuncan baxaram gözünə Təbriz!
Bunu mənə neçə dəfə oxutdu. Hətta Əli bəy bilmirəm indi burdadı? Əli bəy də burdadı. Bəli. Bir gün bəy çox ağır idi. Xəstəliyi bir az ağırlaşmışdı. İndi istəmirəm sizi əfkarlandırım Bəyin o saatlarını xatırlamaqla. Fəqət bu xatirəni canlandırmaq üçün mən təkrarlayıram. Bir az ağır idi halı. Yaxşı deyildi. Əli bəygil məni aldılar Bəyin yanına xəstəxanaya. Heç kəsnən görüşmürdü. Hətta Əli bəygil də, digər yoldaşları ilə eşikdə durdular. Bəy mənə dedi ki, Cavid ağlamaq istəyirəm. Məndən Təbriz mahnısını bir daha istədi. Dedim: Bəy axı indi sizin halınızda ağlamaqdan gülmək daha yaxşı olmazmı. Yox, dedi Cavid. Mən səndən istəyirəm ki, Təbriz mahnısını mənim üçün bir dəfə də oxuyasan. Mən bunu ELÇİBƏY üçün xəstəxanada oxudum. Dinlədi. Dedi ki, Cavid Təbrizdən oxuyanda belə sızıldayaraq, belə özünü gücsüz biri olaraq, təbrizlini gücsüz biri olaraq sakın ola ki, göstərmiyəsən ha… Öz səsi ilə məni təkrar etdi: “Qollarım dolana boynuna bir gün” belə oxuma, yumruğunu düyünlədi. “Qollarım dolana boynuna bir gün”, yumruğunu düyünlədi, dedi, səndən istəyirəm ki, bunu belə oxuyasan. Mən də həqiqətən ondan sonra həmişə Azərbaycan tədbirlərində, konsertlərində, o yerlərdə ELÇİBƏYin mənə o əmrini göz önündə bulunduraraq elə oxumağa çalışıram. Mən sizin çox zamanınızı almaq istəmirəm. Mən ürəyimdəki sözləri əlbəttə indi burda çox həyəcanlıyam, ifadə edə bilmirəm Mən səhnə adamıyam. Mən ancaq səhnədə bir az rahat ola bilirəm. Mən xitabət adamı deyiləm, danışa bilmərəm belə uzun-uzun. Bağışlayın məni, başım-gözüm üstünə oxuyum bir bənd. ELÇİBƏYin ruhunun şad olmasına oxuyuram mən bunu. Çox şad olasınız.
Qollarım dolana boynuna bir gün,
Yenə baş qoyaram dizinə Təbriz.
Həsrətdən, hicrandan cana doymuşam,
Doyuncan baxaram gözünə Təbriz.
Bulanıq suların axsın durulsun,
Təzə günlərinə büsat qurulsun ,
O gül camalına bir də vurulsun,
Heç qubar qonmasın üzünə Təbriz.
Bulanıq suların axsın durulsun,
Təzə günlərinə büsat qurulsun,
O gül camalına bir də vurulsun,
Toz, qubar qonmasın üzünə Təbriz.
Mən inanıram ki, hörmətli öndərimiz bizi eşitdi. Hamınızı burda hiss eləyir. Çox sağ olun. Eşq olsun sizlərə! Var olasız! Çox sağ olun.
Alinti yazidir..
Sagda Büfemiz Var Buyurun Bir Bardak Alin Afiyetle Icin Seker Bitmis ise Lütfen Zile Tiklayin Servisimiz Yardimci Olacaktir..... ..Keyifli Seyirler Dilerim 
AyMaRaLCaN
Cuma Ara. 14, 2012 7:05 am tarafından 
